[Albania] Mijëra në një protestë kundër abuzimit seksual

Afektuar nga rasti më i fundit i abuzimit seksual të një nxënëseje 15-vjeçare në periferi të Tiranës nga një staf shkolle, mijëra qytetarë dhe aktivistë të shoqërisë civile demonstruan të enjten e kaluar, në rrugët e kryeqytetit, duke kërkuar ndëshkime më të ashpra për abuzuesit dhe një rol më aktiv të shkollës dhe shtetit në parandalimin dhe menaxhimin e këtyre rasteve. Akti i abuzimit të së mitures tronditi dhe indinjoi publikun pasi dyshohet se vajza ishte shantazhuar me muaj të tërë dhe megjithëse komuniteti ishte në dijeni të abuzimit, askush nuk reagoi.

Protesta e 4 qershorit ishte shprehja e qëndrimit dhe reagimi i një numri të madh qytetarësh. Një pjesëmarje e tille rezultoi e papritur dhe mjaft aktivistë të të drejtave të njeriut shprehën habinë e tyre kur panë një masë kaq të madhe të mbledhur për një çështje të përbashkët. Protestuesit, përmes pankartave dhe thirrjeve, i kërkuan shtetit të marr masa efektive në mbrojtjen e fëmijëve nga abuzimi, kërkuan që Ministria e Arsimit të rrisë standardet dhe procedurat në edukim dhe mbrojtjen të nxënesve, dhe bënë thirrje për ndryshimin dhe emancipimin e mentalitetit të patriarkatit shqiptar i cili vazhdon të viktimizojë dhe ndëshkojë viktimën në vend të keqbërësit.

Paralelisht me këtë iniciativë është iniciuar një tjetër në internet; "Peticioni per krijimin e nje rregjistri publik per abuzuesit" i cili numëron për momentin më shumë se 35,000 nënshkrime. Kjo masë shoqërohet me potencialin për të zvogëluar mundësinë e ndodhive të tilla, si dhe shërben si një ndëshkim moral dhe njerëzor i abuzuesve.

Këto akte vlerësohen si hapa të shkëlqyeshme drejt marrjes përsipër të rolit avokues te shqiptarëve; veprime që sjellin shpresë për ndryshime të mundshme institucionale dhe shoqërore në lidhje me mbrojtjen sociale në vend.