Qeveritë e Kosovës dhe Malit të Zi, kanë vazhduar përkushtimin dhe përpjekjet e tyre në luftën ndaj trafikimit me njerëz dhe mbrojtjen e viktimave përmes koordinimit, komunikimit dhe shkëmbimit të duhur të informacionit.
Si rezultat i hetimeve profesionale nga Drejtoria për Hetimin e Trafikimit me Qenie Njerëzore (DHTQNJ) në kuadër të Policisë së Kosovës, në dhjetor të vitit të kaluar është arritur të bëhet identifikimi i dy viktimave fëmijë të trafikimit nga Mali i Zi. Viktimat ishin shfrytëzuar për qëllime të kërkim-lëmoshës dhe martesës së hershme në Kosovë. Prej momentit të identifikimit zyrtar, viktimave u është ofruar strehim i sigurt dhe shërbime të nevojshme rehabilituese dhe shëruese nga institucionet përkatëse. Rastet janë trajtuar me prioritet edhe nga ana e prokurorisë dhe gjykatës.
Për më tepër, në shkurt ishte realizuar edhe një takim dypalësh i ekpieve multidisilpinare të Kosovës dhe Malit të Zi, në Podgoricë, me qëllim të shkëmbimit të mirëfilltë të informacionit dhe dakordimit mbi ndërmarrjen e veprimeve të përbashkëta ndërshtetërore në kuptim të menaxhimit dhe kthimit të asistuar të rasteve transnacionale. Si rezultat i komunikimit të vazhdueshëm përmes Zyrave të Kordinatorëve Nacional të të dyja vendeve, në fillim të kësaj jave është realizuar me sukses edhe kthimi vullnetar i asistuar të rasteve përmes zbatimit të Procedurave Standarde të Unifikuara të Veprimit.
Këto janë rastet e para në të cilat janë zbatuar plotësisht këto procedura të cilat janë anekse të nënshkrimit të protokollit shtesë mes Kosovës, Malit të Zi dhe Shqipërisë, për intensifikimin e bashkëpunimit në luftën kundër trafikimit të personave dhe për përmirësimin e identifikimit, njoftimit, referimit dhe kthimit vullnetar të ndihmuar të viktimave, si dhe viktimave të mundshme të trafikimit, në veçanti të fëmijëve”.
Miratimi i anekseve si pjesë e protokollit shtesë është bërë nga Koordinatorët Nacional Kundër Trafikimit të të trija vendeve, në dhjetor 2016. Zbatimi i tyre është mbështetur në vazhdimësi nga Terre des Hommes përmes implementimit të projektit, “Përmirësimi i Ofrimit të Shërbimeve dhe Rritja e Ndërgjegjësimit në Luftën ndaj Trafikimit me Qenie Njerëzore në Balkan, Shqipëri, Maqedoni, Mali të Zi dhe Kosovë”- financuar nga Departamenti i Shtetit Amerikan përmes Zyres mbi Monitorimin dhe Luftimin e Trafikimit me Njerëz, programi J/TiP.