Projekti Childhub i Terre des Hommes Shqiperi, bazuar në kërkesat e përdoruesve të paraqitura në vleresimin e projektit, do te ofrojë mbështetje teknike për profesionistët e rinj/fillestarë që punojnë në fushën e mbrojtjes së fëmijës përmes një qasjeje mbeshtjeje mes kolegësh (peer-to-peer, mentorim/coaching). Mbështetja teknike do të fokusohet kryesisht në çështjet të lidhura me menaxhimin e rasteve në punën e përditshme të profesionistëve të rinj/fillestarë, por në të njëjtën kohë, përmes procesit, do të lehtësojë gjithashtu zhvillimin personal e profesional te profesionisteve. Mentorimi do të ofrohet nga profesionistë me reputacion të konsiderueshëm si ekspertë në fushën e mirëqenies dhe mbrojtjes së fëmijëve në Shqipëri, të cilët shfaqin përvojë të zgjeruar dhe njohuri në këtë fushë, e qe gjithashtu janë të gatshëm të ofrojnë vullnetarisht përkrahje dhe mentorim për profesionistët e rinj/fillestarë.
Në këtë kuadër, më 17 shkurt 2020 u organizua një trajnim/seminar në lidhje me mbikëqyrjen profesionale dhe mentorimin e specialistëve të mbrojtjes dhe mirëqenies së fëmijëve, me pjesëmarrjen e 30 profesionistëve që erdhën nga qytete të ndryshme të Shqipërisë, e që përfaqësuan institucione publike dhe jopublike. Ky seminar, i cili u organizua në bashkëpunim me Save the Children në Shqipëri, ofroi mundësi për prezantimin e një modeli specifik të mbikëqyrjes teknike, të quajtur Action Learning Set, i cili në thelb është një proces që përmban 10 hapa, me qëllim që të ndihmojë profesionistët të shkojnë në thellësi të të kuptuarit dhe reflektimit të menaxhimit të një rasti.
Pjesëmarrësit u ndanë në tre grupe dhe u udhëheqën përmes procesit të mbikëqyrjes dhe patën mundësinë ta provojnë atë për më shumë se dy orë brenda grupit. Përveç vetë përvojës së procesit të mentorimit, kjo përvojë ndihmoi edhe në krijimin e natyrshëm të grupeve të ardhshme të mentorimit, të cilat do të mblidhen në internet një herë në dy javë për të kaluar të njëjtin proces të mësimit dhe zhvillimit profesional. Në përfundim të ciklit, pjesëmarrësve të grupeve të mbikëqyrjes do t'ju dorëzohet një certifikatë.
Në fund seminari u kombinua me një seancë trainimi që i orientoi pjesëmarrësit në përdorimin e childhub.org dhe platformës "zoom" e cila do të përdoret në të ardhmen në takimet virtuale. Shumica e pjesëmarrësve shkarkuan aplikacionin zoom në telefonin e tyre celular dhe u zhvillua edhe një rol-playing përmes realizimit të një takimi virtual.
Pjesëmarrësit e vlerësuan shumë pozitivisht këtë përvojë dhe në fund dukeshin optimistë për të marrë pjesë në këtë model të ri të mbikëqyrjes / këshillimit në internet. Takimet e ardhshme u ranë dakord të zhvillohen në fillim të marsit 2020.