NPR (National Public Radio) në Shtetet e Bashkuara ka bërë një studim në lidhje me mënyrën sesi fëmijët po përballojnë qëndrimin në shtëpi si rezulat i masave kundër përhapjes së Covid-19. Rezultatet e këtij studimi treguan që pas disa javësh karantinim, shëndeti mendor i fëmijëve është përkeqësuar. Fëmijët kanë raportuar mendime për të vrarë veten, makthe, shpërthime inati, regresion, e të tjera.
Pyetja që ngrihet në këtë rast është nëse duhet të hapen shkollat apo jo. Në lidhje me këtë çështje janë pyetur ekspertë të ndryshëm.
Në një deklaratë për senatin, Dr. Anthony Fauci, drejtor i Institutit Kombëtar për Alergjinë dhe Sëmundjeve Infektuese, tha që mungesa e informacionit në lidhje me virusin e bën të detyrueshme mbajtjen e shkollave mbyllur deri në stinën e vjeshtës.
Dr. Dimitri Christakis, një nga mjekët pediatër më të njohur në Shtetet e Bashkuara, si edhe drejtor i Qendrës për Shëndetin, Sjelljen dhe Zhvillimin e Fëmijës, deklaron se ekzistojnë tre rreziqe madhore:
- Humbja e procesit të të mësuarit; ky është një rrezik madhor kryesisht për fëmijët që vijnë nga familje me status socioekonomik të ulët dhe që nuk kanë patur mundësi të barabarta në procesin e mësimdhënies.
- Shëndeti mendor dhe zhvilllimi socio-emocional. një studim i publikuar në JAMA Pediatrics, tregoi nivele të rritura të depresionit dhe ankthit tek fëmijët gjatë periudhës së karantinimit në Kinë.
- Abuzimi. Spitalet në SHBA kanë raportuar një rritje të rasteve të fëmijëve të abuzuar, raste mjaft të rënda, madje deri edhe në vdekje; një rritje e cila përkon me urdhërat e karantinimit.
Një studim i publikuar në Science Journal ka treguar që në fakt fëmijët kanë imunitet të fortë dhe janë më pak të ndjeshëm ndaj infektimit. Megjthatë, duke qenë në kontakt me të tjerët në shkollë ata mund të jenë mbartës dhe ta përhapin virusin në mënyrë të konsiderueshme. Kështu, mbyllja e shkollave luan një rol thelbësor në sheshimin e kurbës.
Për ta përmbledhur, duke marrë parasysh studime të ndryshme dhe pikëpamjet nga profesionistët, mund të thuhet që ekziston nevoja për të gjëtur një ekuilibër mes mësimit, zhvillimit socio-emocional dhe shëndetit mendor të fëmijëve dhe rreziqeve për përhapjen e mëtejshme të koronavirus-it.