Terre des hommes Shqipëri, së bashku me Ministrinë e Arsimit dhe Sportit (MAS) organizoi një tryezë të rrumbullakët virtuale të fokusuar në "Sfidat dhe nevojat e punënjësit të njësisë psiko-sociale në shkolla", me qëllim prezantimin e gjetjeve të një vlerësimi të realizuar gjatë muajve Maj-Qershor 2021 . Raporti i këtij vlerësimi ka për qëllim jo vetëm të informojë, por në të njëjtën kohë të shërbejë si bazë për hapat e mëtejshëm drejt mbështetjes së këtij komuniteti të profesionistëve.
Procesi përfshiu organizimin e 14 grupeve të fokusuara të diskutimit me rreth 130 psikologë dhe punonjës socialë, nga pothuajse gjysma e territorit të vendit. Iniciativa erdhi në kuadrin e projektit të ChildHub në Shqipëri dhe u lehtësua nga dy ekspertet lokale, përkatësisht Proff.Asoc. Rudina Rama dhe Dr Blerta Bodinaku, të cilat ndanë gjetjet kryesore, në tryezën e rrumbullakët të 26 tetorit. Disa nga ato po i përmendim si më poshtë:
- Konfuzion dhe paqartësi e rolit
- Mungesa e instrumenteve thelbësore të punës
- Mungesa e orientimit; trajnimeve cilësore, seminareve apo supervizimit
- Nevoja për kushte më të mira pune dhe pajisja me mjete bazë
- Nevoja për një përfaqësim dinjitoz dhe avokim
- Trajtimi i barabartë me pjesën tjetër të stafit arsimor
Prezenca dhe fjalimi i Zëvendës / Ministres, znj. Nina Guga dhe stafit teknik nga Ministria e Arsimit, znj. Tatjana Vucani, garantuan consideratën e lartë të institucionit kundrejt këtij grupi profesionistësh dhe se sfidat dhe nevojat e tyre janë në qendër të politikave dhe procedurave të ministrisë. Disa hapa janë marrë tashmë në këtë drejtim, të tilla si vendimi i fundit për rritjen e pagës dhe gjithashtu aplikimin në një fond të IPA-s që synon përmirësimin e kushteve të punës së punonjësve të njësisë. Ato theksuan njëkohësisht rëndësinë e koordinimit dhe bashkëpunimit midis institucioneve të tjera publike dhe organizatave private në kombinimin e përpjekjeve për të mundësuar ofrimin e shërbimit cilësor nga këta profesionistë.
Një pjesë e diskutimit përfshiu edhe rolin e Urdhërit të Psikologut. Shumë pyetje dhe sqarime u mundësuan gjatë takimit midis përfaqësuesit të Urdhërit dhe punonjësve psiko-socialë. Sipas z. Igli Cutra, urdhri posedon tashmë njohuritë në lidhje me sfidat dhe nevojat e psikologëve në shkolla dhe se ato janë në një dialog të vazhdueshëm me ministrinë duke shtyrë për përmirësimin e tyre. Në të njëjtën kohë, një pjesë e përpjekjeve të ardhshme të Urdhërit është zhvillimi i protokollit të punës së psikologëve në shkolla.
Takimi konfirmoi edhe një herë rëndësinë e një komunikimi të vazhdueshëm ndërmjet aktorëve kryesorë dhe komunitetit profesional të punonjësve psiko-socialë në shkolla dhe u mbyll me shënimin se iniciativat e tilla duhet të realizohen edhe në të ardhmen.