Agjenda Kombëtare për të Drejtat e Fëmijëve 2017-2020 u miratua me datë 26 Prill 2017 nga Këshilli i Ministrave dhe ka si vizion krijimin e kushteve të favorshme për zhvillimin e shëndetshëm fizik dhe psikosocial të fëmijëve, përfshirjen sociale dhe pjesëmarrjen e tyre në të gjitha proceset, bazuar në interesin më të lartë të fëmijës.
Agjenda përfaqëson një dokument strategjik, i cili shpreh prioritetet e institucioneve shtetërore në fushën e të drejtave të fëmijëve, si dhe njëkohësisht, një kuadër të unifikuar për monitorimin e progresit të Qeverisë shqiptare drejt realizimit të të drejtave të fëmijëve në të gjithë sektorët relevantë. Agjenda synon të arrijë mbrojtjen dhe promovimin efektiv të të drejtave të fëmijëve në Republikën e Shqipërisë, duke zbatuar standartet ndërkombëtare dhe kombëtare në këtë fushë dhe duke nxitur një qasje të integruar dhe gjithëpërfshirëse për të drejtat e fëmijëve.
Kjo Axhendë nuk është vetëm e institucioneve qendrore, por e të gjithë partnerëve që punojnë në fushën e fëmijëve. Agjenda është kostuar dhe në pjesën më të madhe (65%) është e financuar nga buxheti i shtetit dhe donatorët, por ende një pjesë është e pa mbuluar financiarisht. Agjensia Shtetëtore për Mbrojtjen e të Drejtave të Fëmijëve fton të gjithë partnerët, të harmonizojnë planet dhe prioritetet e tyre me këtë plan strategjik veprimi duke koordinuar përpjekjet, por njëkohësisht edhe burimet për një impakt maksimal në mirëqenien dhe të drejtat e fëmijëve.
Agjenda përmban tre shtylla strategjike. 1. Mirëqeverisja në funksion të promovimit, respektimit dhe mbrojtjes së të drejtave të fëmijëve; 2. Eliminimi i të gjitha formave të dhunës ndaj fëmijëve; dhe 3. Sisteme dhe shërbime miqësore ndaj fëmijëve dhe adoleshentëve: zhvillimi dhe arsimimi, drejtësia, shëndeti dhe ushqyerja dhe mbrojtja sociale.