INSPIRE është prezantuar në korrik të vitit 2016, nga Partnershipi Global për të Ndalur Dhunën ndaj Fëmijëve, si një burim i bazuar në të dhëna e fakte, i cili mund të shfrytëzohet nga institucionet qeveritare, agjencitë ndërkombëtare, organizatat joqeveritare, si dhe personat që angazhohen në parandalimin e reagimin ndaj dhunës kundër fëmijëve. Dhjetë agjenci kryesore kanë bashkëpunuar në zhvillimin e këtij projekti, duke përfshirë Organizatën Botërore të Shëndetësisë (WHO), Qendrën e Shteteve të Bashkuara për Kontrollin e Sëmundjeve dhe Parandalimit (CDC), Partnershipin Global për të Ndalur Dhunën ndaj Fëmijëve, Organizatën Amerikane të Shëndetësisë (PAHO), Planin Emergjent të Presidentit të SHBA-ve për Asistencë në luftimin e SIDAs (PEPFAR), Organizatën së Bashku për Vajzat (TfG), Fondin për Fëmijë të Kombeteve të Bashkuara (UNICEF), Zyrën për Droga dhe Krim të Kombeve të Bashkuara (UNDOC), Agjensionin e Shteteve të Bashkuara për Zhvillim Ndërkombëtar (USAID), si dhe Bankën Botërore (WB).
Duke u bazuar mbi të dhënat më të besueshme që gjenden në sferën ndërkombëtare mbi atë se si të parandalohet dhe reagohet ndaj dhunës kundër fëmijëve, INSPIRE prezanton një paketë që përmban shtatë strategji thelbësore (shih Kutinë 1), si dhe dy strategji ndërvepruese: Veprimet multi-sektoriale dhe bashkëpunimi, si dhe monitorimi e vlerësimi.
Janë zhvilluar edhe instrumente të tjera për të ndihmuar politik-bërësit dhe praktikuesit e mbrojtjes së fëmijëve që të praktikojnë strategjitë e prezantuara nga INSPIRE. I pari instrument është Libërthi i INSPIRE: Veprimet për të zbatuar shtatë strategjitë, i cili shërben si një udhëzues i detajuar për secilën nga strategjitë, dhe në të cilin kanë punuar partnerët e INSPIRE (nën udhëheqjen e WHO). Instrumenti i dytë, Udhëzuesi për Treguesit e INSPIRE dhe Korniza e Rezultateve është konceptuar dhe punuar nga partnerët e INSPIRE (nën udhëheqjen e UNICEF) për të ndihmuar institucionet qeveritare dhe partnerët në monitorimin e progresit dhe përcjelljes së ndryshimeve të kohë pas kohëshme.