Qytetari i parë i infektuar nga COVID 19 në Shqipëri u identifikua më 9 Mars 2020. Menjëherë pas kësaj qeveria vendosi një sërë masash për të zvogëluar përhapjen dhe për të rrafshuar kurbën e infeksionit. U kërkua nga të gjithë qytetarët që të qëndrojnë në shtëpi në izolim dhe kudo që të jetë e mundur të punojnë nga shtëpia.
Ashtu sikundër në cdo vend të globit, efektet e izolimit u ndjenë më ashpër në popullatën vulnerabel ku përpos të tjerave rritën rrezikun për një numër më të madh të abuzimeve, veçanërisht tek fëmijët dhe gratë. Në këto rrethana, puna e punonjësve të mbrojtjes nuk u ndal, por ndryshoi modalitet përmes ofrimit të asistencës duke respektuar njëkohësisht rregullat e izolimit dhe distancimit shoqëror. Me qëllim gjëndjen pranë profesionistëve përmes ofrimit të njohurive dhe aftësive, Save the Children në Shqipëri dhe Terre des Hommes Shqipëri kanë organizuar një seri webinare mbi efektet dhe përgjigjen ndaj situatës së krijuar nga COVID 19.
Ky webinar, i dyti i serisë, u drejtohet të njëjtëve profesionistë, Punëtorë të Mbrojtjes së Fëmijëve në Shqipëri, si dhe punonjësve të Njësisë së Vlerësimit dhe Referimit të Nevojave (NARU) sikurse webinari i parë. Ai do të drejtohet nga dy moderatore; znj. Kleopatra Gjana dhe Prof.Asspc. Izela Tahsini të cilat sebashku do përqendrohen në dy aspekte të ndryshme të së njëjtës çështje. Znj. Gjana do të prezantojë çështjet kryesore që mbulohen nga Urdhëri më i fundit i Ministrisë së Shëndetësisë dhe Mbrojtjes Sociale (nr 253 për Menaxhimin e Rastit në kuadër të COVID - 19) duke u pasuar më pas nga prezantimi i znj. Tahsini i cili do të ofrojë udhëzime më praktike dhe të kontekstualizuara të temave / veprimtarive kryesore të përmenura në urdherin e Ministrisë.
Udhëzuesi praktik, i zhvilluar nga Znj, Tahsini, u bazua në udhëzuesit ndërkombëtarë për Menaxhimin e Rastit nën COVID - 19, të hartuara nga Save the Children dhe Terre des Hommes International. Ky udhëzues së shpejti do të ndahet me profesionistët për referencë gjatë punës së përditëshme me rastet e mbrojtjes.