Bllokimet, kufizimet e udhëtimit, ndërprerjet e burimeve dhe masat e tjera për të frenuar përhapjen e koronavirusit të ri po i vënë viktimat e trafikimit njerëzor në rrezik të shfrytëzimit të mëtejshëm, ndërsa rrjetet e krimit të organizuar mund të përfitojnë më tej nga pandemia, sipas Zyrës së KB për Drogën dhe Krimin(UNODC).
Analizat e reja nga agjensia tregojnë se kriza e pandemisë po ndikon në jetën e viktimave të trafikimit para, përgjatë dhe pas përvojës së hidhur.
"Me kufizimin e lëvizjes si pasojë e COVID-19, devijimin e burimeve të zbatimit të ligjit dhe zvogëlimin e shërbimeve sociale dhe publike, viktimat e trafikimit njerëzor kanë edhe më pak mundësi për të shpëtuar dhe për gjetjen e ndihmës", pohon Ghada Fathi Waly, Drejtori Ekzekutiv i UNODC.
Ndërsa vendet kanë mbyllur kufijtë e tyre për shkak të pandemisë, disa viktima nuk janë në gjendje të kthehen në shtëpi. Të tjerët përballen me vonesa në procedurat ligjore, si dhe me një zvogëlim të mbështetjes dhe mbrojtjes në të cilën mbështeten. Disa janë gjithashtu në rrezik të abuzimit ose neglizhencës së mëtejshme nga trafikantët e tyre.
"Trafikimi i qenieve njerëzore është rezultat i dështimit të shoqërive dhe ekonomive tona për të mbrojtur personat dhe grupet më vulnerabël", tha Ilias Chatzis, shefi i seksionit të UNODC që punon për të luftuar këtë krim.
UNODC pohon që partnerët e saj raportojnë se për shkak të pandemisë, më shumë fëmijë janë duke u detyruar të qëndrojnë në rrugë për të kërkuar ushqim dhe para, duke rritur kështu rrezikun e tyre për shfrytëzim.
Për më shumë informacion klikoni linkun më poshtë!