Më 21 shtator 2020, Komiteti i Përbashkët për të Drejtat e Njeriut, në Mbretërinë e Bashkuar, publikoi raportin ‘Reagimi i Qeverisë ndaj COVID-19: të Drejtat e Njeriut', në të cilin një temë shqetësuese ishte e Drejta për Jetë Familjare për njerëzit e ndaluar, me fokus të veçantë fëmijët. Në Mbretërinë e Bashkuar ka mijëra fëmijë që çdo vit kanë një prind në burg, ose në një qendër të kujdesit shëndetësor, ose prindër që kanë fëmijën e tyre të burgosur ose në institucionet e shëndetit mendor. Gjatë karantinës, këtyre institucioneve u desh të bënin një zgjedhje të vështirë: të mbronin "Të Drejtën për Jetë Familjare" apo të siguronin "Shëndetin Publik"?!
Konventa për Mbrojtjen e të Drejtave të Njeriut dhe Lirive Themelore të Këshillit të Evropës deklaron në nenin 8 se "Autoriteti publik nuk mund të ndërhyjë në ushtrimin e kësaj të drejte, përveç kur kjo ndërhyrje është në përputhje me ligjin dhe e nevojshme në një shoqëri demokratike, në interes të sigurisë kombëtare, sigurisë publike ose mirëqenies ekonomike të vendit, për parandalimin e krimit, për mbrojtjen e shëndetit ose moralit, ose për mbrojtjen e të drejtave dhe lirive të të tjerëve.”
Fëmijët dhe prindërit e prekur nga masa kufizuese u pyetën si ndihen në lidhje me ndalimin absolut të vizitave në burgje dhe ambiente të tjera. Ata shprehën pakënaqësi dhe irritim duke thënë se ky është trajtim çnjerëzor. Aktivistët u thanë deputetëve se një sjellje e tillë do të ketë ndikim shkatërrues për këdo që është subjekt i masës ndaluese.
Nga ana tjetër Qeveria thotë se jeta e njerëzve aktualisht përbën prioritet dhe se është e përkushtuar për të mbrojtur dhe forcuar shëndetin publik, ekonominë dhe shoqërinë në përgjithësi.