Riintegrimi në shoqëri të fëmijëve në konflikt me ligjin është iniciativa më e re e Programit të drejtësisë për të mitur të Tdh Shqipëri. Në këtë kuadër, në 3 qershor 2019, një tryezë e përbashkët diskutimi mblodhi së bashku përfaqësues nga institucionet kyce si Ministria e Drejtësisë, Bashkia e Tiranës, Ministria e Shëndetësisë dhe Mbrojtjes Sociale, Agjencia Shtetërore për Mbrojtjen dhe Të Drejtat e Fëmijëve, Avokati i Popullit, Shërbimi i Provës dhe Organizatat e Shoqërisë Civile të angazhuara në këtë proces.
Në fjalën e saj përshëndetëse, drejtoresha kombëtare e Terre des hommes, Alketa Lasku, theksoi rëndësinë e krijimit të një qasjeje gjithëpërfshirëse për integrimin e të miturve në konflikt me ligjin dhe rolin e secilit institucion në hartimin dhe zbatimin e programeve të dedikuara për mundësimin e një riintegrimi të plotë të fëmijët në shoqëri dhe zvogëlimin e recidivizmit.
Më tej, në fjalën e tij, Ministri i Drejtësisë, z. Toni Gogu, solli në vëmendje faktin se Shqipëria tani ka një kornizë ligjore në përputhje me standardet ndërkombëtare, gjë që përbën një premisë pozitive në sigurimin e mbrojtjes dhe shërbimeve të duhura që ligji siguron për të miturit në konflikt me ligjin. Ai përmendi nevojën për një bashkërendim më të mirë midis institucioneve të drejtësisë për të mitur dhe në të njëjtën kohë falënderoi rolin e organizatave të shoqërisë civile në përgjithësi dhe Terre des hommes në veçanti, për kontributin e tyre gjatë viteve në përmirësimin e sistemit të mbrojtjes të të drejtave të fëmijëve në Shqipëri.
Nevoja dhe rëndësia e ndërtimit të qasjeve të integruara dhe modeleve të shërbimeve multidisiplinare për trajtimin e fëmijëve në konflikt me ligjin qenë gjithashtu tema kryesore në pikat e diskutimit të Ministrisë së Shëndetësisë dhe Mbrojtjes Sociale dhe Drejtorisë së Përgjithshme të Shërbimeve Sociale në Bashkinë e Tiranës, përfaqësuar nga Znj. Merita Xhafa dhe Anisa Ruseti.
Në përfundim të diskutimit u zhvillua një prezantim i hapave konkretë të kësaj nisme nga Terre des hommes. Me pak fjalë, projekti do të synojë të hartojë dhe zbatojë një model shërbimesh të integruara restauruese për fëmijët në konflikt me ligjin, duke u bazuar në parimet e sistemeve të integruara të kujdesit, mbrojtjes sociale dhe qasjes multidisiplinare të aktorëve të ndryshëm.
Kjo nismë do të synojë të ofrojë mbështetje për riintegrimin e 40 fëmijëve / të rinjve në konflikt me ligjin në Shqipëri.