UNICEF, si pjesë e një programi të përbashkët të OKB-së për të avancuar kujdesin social dhe përfshirjen sociale në vend, po ndërton kapacitetet lokale për popullimin dhe përdorimin e Sistemit te Menaxhimit të Informacionit (MIS) për shërbimet e kujdesit shoqero, si pjesë e sistemit te mbrojtjes së integruar sociale. UNICEF mbështeti zhvillimin e sistemit në vitin 2016 dhe tani është duke avancuar veprimet për ta bërë atë funksional. Një punë e tillë përfshin ndërtimin e kapaciteteve të zyrtarëve të NJQV-ve, zyrtarëve të SHSSH dhe ofruesve të shërbimeve në popullimin dhe përdorimin e sistemit të menaxhimit të informacionit për shërbimet e kujdesit shoqeror në 18 bashki. Puna pritet të përfundojë deri në fund të prillit 2019.
Në këtë kuadër, më 18 shkurt u realizua një trajnim tre ditor për aftësimin e profesionisteve të këtyre bashkive në përdorimin e MIS. Nëpunësit socialë, punëtorët e mbrojtjes së fëmijëve, punonjësit e departamentit të shërbimeve sociale në Bashkinë e Tiranës, së bashku me përfaqësuesit e Shërbimit Social Shtetëror dhe Ministrisë së Shëndetësisë dhe Mbrojtjes Sociale, patën mundësi të mësonin në praktikë mënyrat e përdorimit të këtij sistemi si dhe mundësitë që ofron për të vlerësuar dhe trajtuar situatën e fëmijëve dhe familjeve në nevojë sipas standardeve.
Sigurimi i të dhënave cilësore për fëmijët dhe familjet që marrin shërbime të kujdesit shoqeror në bashki do të jete e mundur vetëm nëse kemi një sistem të mirë informacioni për mbrojtjen sociale. Regjistri i shërbimeve elektronike i integruar me regjistrin kombëtar të mbrojtjes sociale, mund të jetë një instrument i rëndësishëm në duart e qeverisjes vendore dhe lokale për të vlerësuar ndikimin e politikave të mbrojtjes sociale.