Shtatë gazetarë kosovarë u nderuan me çmime nga koalicioni i organizatave për mbrojtjen e fëmijëve në Kosovë, i njohur si KOMF, për punën e tyre në fushën e mbrojtjes së fëmijëve. Gazetarët e mbështetur nga Rrjeti Ballkanik i Gazetarisë Hulumtuese (BIRN) përgatitën video dhe artikuj investigues në lidhje me të drejtat e fëmijëve. Dy nga punimet më të vlerësuara ishin ato të Behar Mustafës me reportazhin televiziv, "Kontrabandimi i fëmijëve në Itali" dhe kolegut të tij Agon Sinanaj me artikullin "Fëmijë të harruar".
Çmimet u dhanë si pjesë e projektit "Forcimi i Shërbimeve Sociale për Fëmijët dhe Familjet në nevojë", i financuar nga Ambasada Zvicerane në Kosovë dhe implementuar nga KOMF.
"Kontrabandimi i fëmijëve në Itali" hedh dritë mbi kontrabandimin e fëmijëve të mitur në Itali. Intervistat e policisë dhe prokurorëve italianë shpjegojnë të gjithë procesin e krimit.
"Fëmijët e harruar" përshkruan jetesën e familjeve që kujdesen për fëmijët me aftësi të kufizuara duke treguar të gjitha vështirësitë me të cilat ato përballen çdo ditë. Artikulli prekës u bën thirrje autoriteteve kompetente të bëjnë më shumë për fëmijët me aftësi të kufizuara.