[Albania] Tdh Shqipëri reagon ndaj menaxhimit të protestave të fundit në vend

Duke marrë shkas nga protestat e fundit në vend, ku ka patur edhe pjesëmarrje të shumë të miturve, Terre des hommes i ben apel Policisë së Shtetit dhe organeve të tjera ligj-zbatuese, të udhëhiqen nga parimet e mbrojtjes së të drejtave të njeriut dhe veçanërisht të drejtave të fëmijëve në të gjitha aktet proceduriale që lidhen me të miturit.

Nisur nga raportimet mediatike dhe imazhet filmike që qarkullojnë në rrjet, jemi të shqetësuar për sjelljet e dhunshme nga ana e efektivëve të policisë në protestat e dy ditëve të fundit. Duam të sjellim në vëmendje se ushtrimi i dhunës është një veprim totalisht i papranueshem dhe përbën shkelje të Kushtetutës së Shqipërisë sipas Nenit Nr 54. Për më tepër, është detyra e çdo shteti të sigurojë në maksimumin e mundësive të tij zbatimin e të drejtave të fëmijëve.
I kërkojmë Policisë së Shtetit dhe në veçanti Njësisë për Intervistimin e të Miturve të zbatojnë Ligjin “Për Mbrojtjen dhe të Drejtat e fëmijës” dhe Kodin e Drejtësisë Penale për të Mitur dhe të gjitha procedurat dhe protokollet e nevojshme për të minimizuar numrin e të miturve të shoqëruar në komisariate dhe të proceduar penalisht.

Gjithashtu, duhen siguruar menjëherë të gjitha mekanizmat e nevojshme ligjore të intervistimit të përshtatshëm të të miturve duke zbatuar Nenin 18 të Kodit të Drejtësisë për të Mitur, për praninë e një psikologu; mbajtja e të miturve në ambjente të posaçme; sigurimin e ndihmës ligjore dhe mbështetjes psiko-sociale në çdo fazë të shoqërimit të të miturit në konflikt me ligjin. Komunikimi me prindërit apo përfaqësuesit ligjorë të të miturve duhet të kryhet menjëherë, në mënyrë që të sigurohet maksimalisht mirëqënia fizike dhe psikologjike e fëmijëve dhe të rinjve të shoqëruar.

I kërkojmë të gjitha organeve ligj-zbatuese të sigurojnë me çdo kusht dhe në çdo rrethanë zbatimin e të drejtave të fëmijëve dhe të rinjve sipas parashikmeve të legjislacionit kombëtar dhë ndërkombëtar për mbrojtjen e fëmijëve.